Այս բաժինը պատրաստելիս մենք հավաքվել էինք ամբողջ թիմով ու փորձում էինք ստեղծել մի այնպիսի ամպագոռգոռ տեքստ, որ ընթերցողը հասկանա՝ սա լավագույն առցանց գրախանութն է ոչ միայն Հայաստանում, այլև դրա սահմաններից դուրս: Մի քանի ժամ ու մարդա երեք շիշ գարեջուր անց հասկացանք, որ այս բաժինը ստեղծելու համար լավագույն տարբերակն է պատկերացնել, որ զրուցում ենք մեր հաճախորդներից մեկի հետ, և նրա հարցին, թե ինչ եք որոշել անել, պատասխանենք ու պատասխանը ձևակերպենք այստեղ:
Եվ այսպես, ո՞վ ենք մենք: Մենք սովորական հայաստանաբնակ երիտասարդներ ենք, ովքեր պարզապես սիրում են ընթերցել և ամսեկան իրենց եկամուտի բավական մեծ մասը ծախսում են գրքեր ձեռք բերելու վրա: Բայց ահա եկավ 2020 թվականն ու իր հետ բերեց կոռոնավիրուսային ինքնամեկուսացումը: Հենց այդ ժամանակ մենք հասկացանք, որ Հայաստանում, ցավոք, չկա որևէ առցանց հարթակ, որտեղից իսկապես հարմար է գիրք գնել: Մի տեղ խանգարում էր գրքերի մեծամասնության բացակայությունը, մեկ ուրիշ տեղ՝ առաքման բարձր գները, երրորդում՝ գիրքը որոնելու և գտնելու ծայրահեղ անհարմար համակարգը: Հենց այդ ժամանակ մենք որոշեցինք ստեղծել հարթակ, որտեղ գիրք ձեռք բերելն էականորեն չի տարբերվի գրախանութում գիրք գնելուց: Դե, հասկանում եք, երբ մտնում ես գրախանութ ու կարող ես երկար ժամանակ անցկացնել այնտեղ՝ քրքրելով գրքերն ու փնտրելով ամենահետաքրքիրը: Այսպես ասած՝ գրախանութ համակարգչում և հեռախոսում, այլ ոչ «սայթ, որտեղ կարաս գիրք առնես»:
