Յոհաննա Սփիրի
Շվեյցարացի արձակագիր, մանկագիր
(1827 – 1901)
Ծնվել և մեծացել է Ցյուրիխի մոտակայքի Հիրցել գյուղում: Հայրը բժիշկ էր, մայրը՝ գրական ձիրքով օժտված. գրում էր երգեր ու բանաստեղծություններ: Ընտանիքում կային ևս հինգ երեխա՝ երեք աղջիկ և երկու տղա:
1852 թվականին Յոհաննան ամուսնանում է իրավաբան Բեռնարդ Սփիրիի հետ, տեղափոխվում Ցյուրիխ և հայտնվում գրողների ու նկարիչների հետաքրքիր միջավայրում: Այս հանգամանքը բարենպաստ ազդեցություն է ունենում նրա գրական տաղանդի զարգացման վրա: Նա սկսում է պատմություններ գրել որդու համար, ապա նաև հրատարակում դրանք՝ իր գրվածքների դիմաց ստացած հոնորարների մի մասը տրամադրելով ֆրանկոպրուսական պատերազմից (1870-1871) հետո Շվեյցարիայի վիրավոր զինվորներին:
